Guru Ngaji dalam Sejarah Betawi

“Semua-mua dah dialamin orang Betawi, kecuali Murtad“ Begitu kata Alm. Buya Hamka Rohimahullah suatu ketika dalam buku karya Kong Haji Ridwan Saidi yang judulnya orang betawi dan modernisasi Jakarta.

Orang Betawi itu identik ma Islam, mangkenye, orang-orang asli Jakarta yang agamanye kristen yang tinggal di daerah Tugu, Jakut, dipanggil orang tugu. Atau orang-orang asli Jakarta kristen yang tinggal di Depok disebut Belanda Depok.

Jadi, sebutan orang betawi itu dikhususkan buat yang muslim doangan, gak bisa agama laen. Ini kenape sebabnye…waahh panjaaaaang kalo mau diterangin disini. Udah banyak sumber-sumber laen yang nerangin hal beginian. Intinye sih kalo mau disimpulin begini nih, orang betawi tuh nganggep agama kristen itu agamanye penjajah. Agamanye kumpeni. Jadi haram hukumnye ngikutin agamanye kumpeni Belande. Dah gitu, agama Islam itu dijadiin simbol perlawanan rakyat melalui ulama, tuan guru, haji, habaib yang gak mau dijajah kapir belande. Zikir, Ratiban, baca manakib, maulid barjanji ampe diba’, itu semua dijadiin rakyat sebagai simbol perlawanan ame kumpeni. Mangkenye, kagak mau tuh orang betawi jaman dulu disamain agamanye ma Belande. Najis Mugholladoh dah pokoknye.

Jadi, semua penderitaan udah pernah dialamain orang betawi dari jaman penjajahan ampe jaman sekarang enih. Kecuali murtad jadi orang kapir.

Mangkanye, istilah kemiskinan dekat kepada kekufuran itu kagak berlaku buat orang betawi. Ane ngomong fakta nih. Bukan asal goblek doang.

Nah, karena ulama & guru ngaji jadi simbol perlawanan rakyat ame Belande, kehidupan orang betawi kagak bisa dah dilepasin dari Islam dan syareatnya.

Dari mulai yang paling pribadi deh. Disunat. atawa dikhitan. Mau ama mantri, bengkong, atau dokter. Bebas terserah ente. Orang betawi punya adat tuh, disunat dari kecil. Kagak ade tuh ente liat, masuk SD ada anak yang belom disunat. beeuuhh….malu…

Sebab, enyak babeh & masyarakat kita suka nyindir, kalo belom disunat, gak boleh solat di shaf depan belakang Imam. Yah..lama-lama malu dah bocah, kalo solat di belakang mulu. Mangkenye, masih pada piyik-piyik, bocah-bocah dah pada disunatin tuh.

Yang kedua, ngaji. Kiamat dah kalo ada anak betawi yang gak gableg ngaji. Minimal turutan dah. Alias juz 30 kalo orang sekarang bilang. Jaman ane kecil nih, kagak ada tuh ceritanye, anak-anak yang magrib ampe isya di rumah. Kudu ngaji semua. Kalo gak di musholla, ya di langgar. Lah emang ngaji boleh dilanggar?? ya, bolehh..tuh ane ngelakonin sendiri. hehehe. Berani-beranian ente gak ngaji….blettaaaaaaakkkkk…bakiak melayang, atau rotan nyamber.

Beneran nih, ane gak becanda. Keras dulu guru ngaji kita kalo ngajarin. Salah dikit ato dah sebulan kagak apal-apal tabbat yada, dijamin tangan ente merah-merah dah dihajar rotan. Berani lapor ortu?? mana berani….yang ada diempanin lagi ke ustad nye…sambil ngomong “nih ustad, hajar aja nih bocah sampe bisa, saya ikhlas, emang badung dia nihh, kagak mau ngaji…!!”

timbang dihajar lagi, mending diem yak…hehe…

Beda ma ortu jaman sekarang. Diomelin dikit, pelanggaran HAM katenye, lapor polisi, rame, ributt…hadeeuuhh… ribet dah.

Padahal juga cuman dijiwir, kerasan dikit dijenggut, begitu aja lapor. Heran gue…

Nah mangkenye, sebangor apapun anak betawi, pasti pada bisa ngaji semua. Lidahnya kagak kaku ma quran. Gape kalo disuruh baca quran.

Ini teguran nih buat kita-kita semua, orang tua-orang tua karir, yang gak ngurusin ibadah anak-anak, yang gak peduli, atau yang nyerahin anak begitu aja ama tpa tanpa diawasin lagi. Inget bang-mpok, anak entu amanah dari Allah, kalo dia gak bisa sholat gak bisa ngaji, nyang pertama diseret tuh kita, orang tuanye yang gak ngajarin ngaji. bukan orang lain.

Jadi pesen ane nih…keras dikit gapapa dah ngajarin anak. Namanya jaman sekarang semua tinggal enak ya, jadi maklum kalo anak2 pada males. Sesekali disabet juga manjur tuh, sesekali yaa..jangan saban malem disabet mulu…kasian bocah…hehe…lagian janjiin juga ma dia, kalo dah apal surat ini, surat itu, nih, maenan buat elu tong…elu mau kagak…pasti dah pada semangat ngajinye, solatnye, ibadahnye…

udah ye segitu dulu….salam puasa senen-kamis dari ane..

Salammualaikum…

Subscribe to receive free email updates:

0 Response to "Guru Ngaji dalam Sejarah Betawi"

Posting Komentar