Pohon Bandotan, Tumbuhan Obat dari Betawi yang Mulai Langka | Oleh Bang Hendy

GoBetawi.com - Kemaren ane berdua ame kawan maen ke daerah Depok, kekampung Duren Cilodong,  Ngeliat tane Mertue yg katenye mao dijual, daerahnye masih kebon.. Pohon Bambu masih rimbun...Adem ... Kebonnye ngingetin ane ame Condet jaman dulu, ane liat banyak pohon "BANDOTAN".. Yg dicondet ude langke banget....ane foto tuh pohon, Saat ane motret pohon Bandotan, temen ane nanya.."Lah, elu gimane sih..? Yg mao dijual Kebon , ngape jadi pohon Bandotan yg elu potret, mao juga kebon yg elu potret, gimane situasinye...buat laporan nanti. Ame yg mao beli.

* Bang Haji, kan tau pohon Bandotan ntu obat, dikampung kite ude langke banget...
". Iye gue tau... Eh tapi ngomong-ngomong buat obat apa'an ye gue lupe...abis ude kelamaan..
* Pohon Bandotan ntu, mengandung senyawa Kimia 'KUMARINE, EUGENOL 5%, dan HCN...
Kegunaannye..

Akarnye direbus selame setengah jam, atau aer 2 gelas dijadiin 1 gelas, diminum buat sakit Demam, ame obat disentri...

Daonnye ditumbuk dicampurin kapur sirih dikit, buat obat koreng...
Daonnye direbus, selame 15 menit, aer rebusannye buat obat mencret....
Sekarang inget ga bang Haji...kegunaan pohon Bandotan...

". Iye,iye gue inget ... Dulu gue kalo sakit mencret, dikasih rebusan daon Bandotan ame Nya' gue... Hehehehehe...inget aje lu Hen..jadi inget masih anak-anak ye...
* hehehehe...nyo' deh, kite terusin.. Ngukur kebonnye...
" Nyoooo.....

Oleh : Bang Hendy

Klik Download Untuk Aplikasi Android GoBETAWI.com

Tweet

Subscribe to receive free email updates: